رثاء في وفاة وزير الداخلية الأمير (نايف بن عبدالعزيز ) رحمه الله
البارحة فالليل مانامت العين
والريق ناشف مايبل الشفايف
ساري مع الهوجاس مدري على وين
واغوص في بحره واجيب الطرايف
لاعاد يوم السبت ستة وعشرين
في شهر سبعة فاجعة موت نايف
فجيعة هزت قلوب الملايين
كم واحد منها دموعه ذرايف
يبكي على رجل الامن حامي الدين
اللي حماها من جميع الطوايف
يوم المعارك في جميع الميادين
من حولنا والكل يسمع وشايف
حنا تحت ظل الرجال الحكيمين
مافيه أحد منا مشرد وخايف
مير القدر لا جاء مثل راعي الدين
ياكم فرق من قلوب ولايف
حنا بحكم مدبر الكون راضين
وش عاد ينفع لو نزيد الحسايف
مرحوم يا ريف الضعوف المساكين
جعل لهم كل الثقايل خفايف
عساه في جنة عدن قولوا آمين
يقرأ كتابه يوم نشر الصحايف
وان عاش أبو متعب لنا حظنا زين
ليا دعانا ما نحسب الكلايف
حنا هذيل مرجحين الموازين
فرسان حرب ومتعبين العسايف
مع النبي في معركة بدر وحنين
مانضرب إلا بالسيوف الرهايف
وصلوا على خاتم جميع النبيين
عداد من بالبيت يسعى وطايف
|