::{ مجالس قبيلة هذيل  }:: موقع يهتم بتراث القبيلة ومفاخرها

::{ مجالس قبيلة هذيل }:: موقع يهتم بتراث القبيلة ومفاخرها (http://www.hothle.com/vb/index.php)
-   المحاورات المباااشرة (http://www.hothle.com/vb/forumdisplay.php?f=67)
-   -   متصفح المحاورات المباشره (للاطلاع) (http://www.hothle.com/vb/showthread.php?t=41258)

الحميا 07-06-2010 02:40 AM

متصفح المحاورات المباشره (للاطلاع)
 
امـــــســيات هــــــــذلـــــيه

اعزائي هذا المتصفح خاص للمحاورات المباشره
وسوف يبقى مغلق وهوا للاطلاع فقط
---------------------------------------------------------------



الامسيه الاولى

الاثنــيـن 23/7/1431


========================


عبـيد السالمي



سـلام رديـه نغنيهـا علـى البحـر الطويـل///لاكن معناهـا علـى السبـع البحـور يعومهـا
اكرب حزامك واحسب احسابك ترى المعنى ثقيل///نبغا علـوم اتعـد اذا جـات العـرب بعلومهـا




ابو ملاذ
يامرحبا ترحيبة البدوان بقـدوم المخيـل///ترحيبةً توفي مطاليق الوجيـه الزومهـا
صاحبك في جرة معانيك الكثيره والقليـل///جيب البضاعه والرجال اتشوفها واتسومها



عبـيد السالمي

يلي تشوف البرق جاك الخير بعد البرق سيل///يجونك البدوان وتودي الخبـر مـن يومهـا
ويش ابتحط امن المعاني ياعميلي وش تشيل///السوق غالي والقبايـل عارفيـن اسلومهـا



ابو ملاذ

اللي من اول وسط بطن البندقه ثارت بليل///لا صابت الشاره ولا ظلت جداد اختومهـا

العام ياتيك العسل والسمن من وادي طفيل///واليوم تاكلها بصل متخالط(ن) مع ثومها



عبيدالسالمي

ماهو مضوي فود رجال احتزم بام الفتيـل///ان ضاع مرماها يعودفي الاخيـر يلومهـا

دنيا البنادم ساعه اتغره ليا وقت الرحيـل///ان نام يحلم وان صحي فسر طوال احلومها





ابو ملاذ


بعض البنادق بور لاتقتـل ولا تحـيّ قتيـل///مركوزة(ن) عند البياطرماسحيـن ارقومهـا
ان عشت في دنيا تشوف انك بها عابر سبيل///لباسـة الجـوخ الحمرلاتنخـدع فهدومهـا





عبيد السالمي


لا تحسب النخله توبر في زمن صيف النخيل///احرمتني الحجه وراحت حجتـك بقدومهـا
ان عشت في دنياك اضنك تبتجيب المستحيل///والـى تعلـى رتبتـك تيجانهـا ونجومهـا





ابو ملاذ


ان كان لك غرسا بعيد العرق عن درب المسيل///لا تكثر اللامه على بـرق السمـا واغيومهـا
ان عشتُ ماني شاري الناقه ومعطيها عميـل///ايقودها وايسوقهـا حتـى تطيـح اعزومهـا



عبيد السالمي


اصهل كما بعض الخيول ان كان معجبك الصهيل///لاكن لا تفرح ترى راس الفرس فـي الجامهـا

راحت علومك في النهايه بين عدل وبيـن ميـل///ودك تليـم قومهـا والــى تـفـرق كومـهـا



ابو ملاذ


واشبك تسم ذودك بميسم ماهو ابميسم هذيل///فتّح وخل العين تطرد عن حدقهـا نومهـا

اليامنعك النحل عن ذوق العسل ماهو بخيل///لكن حاسب لك سنين الزوم تكمل صومهـا

عبيدالله المجيريشي 07-06-2010 06:29 AM

رد: متصفح المحاورات المباشره (للاطلاع)
 
محاوره جميله جدا ورائعه كروعة شعرائها

لي ملاحظه بسيطه على هذا البيت في وزن اخر الشطر


اصهل كما بعض الخيول ان كان معجبك الصهيل///لاكن لا تفرح ترى راس الفرس فـي الجامهـاوالقافيه على وزن اومها
مع تمنياتي للجميع بالتوفيق

الحميا 07-12-2010 01:06 AM

رد: متصفح المحاورات المباشره (للاطلاع)
 
بن قاسي الهذلي

اللـيـلـه المـعـنـى عـلــى روس الـجـبـال نعـلـقـه ***** ولا تــحــت كــــم الـعــبــاه نــمـــرره مــاحـــد درى
سلام منصاه البقيلي لو على الصخر فلقه *****ياهل الشفـا كـم عـام والمنبـر لـراع المنبـرى


الحميا

الليله المعنى على جمر الغضى نبنسلقه ****** جود عباتك يابن قاسي والبرى مالك برى
يامرحبا ترحيب دايم للمسلم نطلقه ***** انا اخبرك قدام ماترجع يابن قاسي ورى



بن قاسي الهذلي

دام الـبــقــا والــبـــاب دونـــــك يالـبـقـيـلـي نـغـلــقــه *****لن كنت منت من النجوم اللي منازلها ترى
الــــي يــقــرب راســـــه الــحـــلاق غــيـــر يـحـلـقــه ****عشـريـن عــام وزود ماشفـنـا لبـوزيـد خـشــرى




الحميا

باالقلقله راس البقيلي مانت قادر تقلقه ***** والي قرا يعلم الي في المدارس ماقرى
الي يقرب راسه الحلاق يدخل بحلقه ****** وانته مع اصحاب المدن والى مع اصحاب القرى




بن قاسي الهذلي

انته تسمى مبتدي حتـى ان كتبـت معلقـه *****والاوله راحت لهلها مير خلك في السرى
ودك بـتـذكــرة الـصـعــود لـطـايــرات مـحـلـقـه *****متع عيونك بالنظر حتى لو انـك بالثـرى




الحميا

صحيح انا اسمي مبتدي لاكن شربك معلقه ***** والله ليقتلك العطش وانته في حكمة هل ترى
يلي تبشلق لا تبشلق مانت قد البشلقه ******* احطب من اغصون السلم والى غصون العرعرى




بن قاسي الهذلي

كــل عـلـى سـاقـه يـقـف ولـــى زمـــان العمـلـقـه *****اشرب على قدر الظما والزود عندك ينثرى
لـيـتـك خـذيــت الـــدرب كـلــه يالبقـيـلـي زحـلـقـه *****مـاكـان تـعـبـت الـقــدم والـفــود لاشـــي يـذكــرى




الحميا

يلي يديك امكلبشه انا يديه مطلقه ****** وماني مثبت صورتي فوق البطاقه بالغرى
بنت الهوى خطابها عشرين ماهي مطلقه ***** وانا ذرى الي ياولد قاسي يدور للذرى




بن قاسي الهذلي

كـم صـورةٍ فيـهـا عـيـون الـنـاس دوم مبحلـقـه *****وكم صورة فيها عيون الناس عيت تنظرى
بـنـت الـهـوى لـلـي هـواهــا يالخـطـيـب معـلـقـه *****وانتـه تجـاوزك القطـار وجــرح قلـبـك مـابـرى




الحميا

اتعبت فكرك يابن قاسي في علوم امغلقه ****** كثير مثلك يامغني يوم تشبع تبطرى
وشبك تعزلق ليش تاخذ من طباع العزلقه ***** لا والله الى ياولد قاسي سرى ليلك سرى









الحميا 07-20-2010 03:32 PM

رد: متصفح المحاورات المباشره (للاطلاع)
 

محاورة الشاعرين
خضر البقيلي ( الحـــميا )

و

شــاهر الهذلي (ابو ملاذ )
--------------------------------------------



الحميا


تقفي اهجوس ياشاهر وتقبل هجوس = والمعاني على خط الرياض السريع

المدرس تعب من كثر شرح الدروس = والغبي مايميز صيف وإلا ربيع


ابو ملاذ

الخلل في المنيحه لو تدر الديوس = ماضمي راعي المعزا ومات الرضيع

لا تقدم دروس بلا مقابل فلوس = لجل تشري وتقدر في النهايه تبيع




الحميا



بعد صاب البلا روس البقر والتيوس= والبواخر ثلاث ارباع منها رجيع

وش دوا السوس لي خلخل صليب الضروس = علة الضرس مايصبر عليهاالشجيع



ابو ملاذ




لاتجمع في حثلك حب مليان سوس = خلها في المخازن دامها ماتــريع

قلع ضرسا مودع خير له من جلوس = بين باقي السنون اللي جماها منيع


الحميا


انت اشوفك تلكع كن ناشك حسوس = كيف زرت المدينه ماوصلت البقيع

ياكبار النفوس وياضعاف النفوس = زبدة البدو من شمس الضهيره تميع


ابو ملاذ




مابحل القضيه باليمين الغموس = وانت جرتك ارها دارقه في الوشيع


يوم تزرع ولاتسقي عروق الغروس = ليش تمنع ورقها عن رعاة القطيع



الحميا


كنت مسلم ياشاهر وافسدوك المجوس = والله انك منول في المقام الرفيع


يوم ثارت بني مره لثار البسوس = وخلت الزير سالم في النهايه يضيع


ابو ملاذ


رحت تمسح لسانك في طرف حد موس = وانت عنها من اول وسق مثناة ريع


خابر الزير سالم في النهار العبوس = يشرب الما من البدره ويقرع قريع


الحميا


يوم وجهك بشوش ويوم وجهك عبوس = سبع واربع وعشره في حساب السبيع

مانت لاقي نحيلي في عروض الطعوس = النحيلي ورا حداد دون القريع


ابو ملاذ



الفصول اربعه والكل فصلـ(ن) لبوس = كل واحد يقدم قــد مايستطيع

تتعب الرجل لجله لو برمضا تدوس = دام للبرق في عين السحابه لميع












الحميا 08-08-2010 01:25 AM

رد: متصفح المحاورات المباشره (للاطلاع)
 
محاورة الشاعرين

الشاعر/ ماجد الميزاني المطيري
و
الشاعر / محمد بن حميد الزيداني الهذلي




ماجد الميزاني





ياسلام الله سلامٍ فيه جـل مـن التحايـا//////في محل هذيل قبل هذيل يذبحني غلاهـا


السوالف يامحمد جات مـن بـذ الخفايـا////////ودنا نكشف عن الحره ونعرف وش وراها




محمد الزيداني





ياهلا يامرحبا بك من مجهـزت السرايـا//////مثل ماتغلي هذيل مطيـر نغليهـا كماهـا


يالمطيري من هو اللي يعلم أسرار النوايا////////مير من دون الحرار اذياب يقنب لك عواها




ماجد الميزاني






البقا يهل العلوم الطيبه وهـل الحمايـا//////رافع الله شانها مع قدرها من مستواها


النوايا طيبه وعلومنـا سـر وخفايـا////////والذيابه يامحمد نحمد الله في حماهـا



محمد الزيداني





اختصرنا صورة الواقع حسب حجم المرايا///////والحقيقه صورة الواقع مااحد يلحق مداها


كل وقت وله رجال وكل حرب وله ضحايا////////احسب حسابك ترى الدنيا بدت تدرج رحاها




ماجد الميزاني





صورة والواقع حقيقه يوم عقلت المطايـا///////والحقيقه عن ديار هذيل تعرف من حصاها


تاكل النيبان قسم ويش قسمـك يالثنايـا//////والرجال الي تعز اشنابهـا تكـرم لحاهـا



محمد الزيداني





منت موزم تنزوي ياماجد افبعض الزوايا//////مير ماني هادي المطران والله ماهداها


الشواويه شواويـه وتقنـع بالشوايـا//////والذيابه من حلال القوم جاب الله عشاها




ماجد الميزاني





يابليس القوم كانك جيـت جفلـت الرعايـا///////مير حاسب للقدور البيض لاتكشف غطاهـا


انت وش حصلت يومك جيت من سبت العلايا////////نعرفك تاخذ حلال القوم ماتسـرق غداهـا




محمد الزيداني





مانكب بعض العرب ربي يكود من الخطايا///////نكشف اقدور العرب واقدوركم نغطا علاها


جيتكم بهذيل من مكه على ضهور السبايا///////اهذليً لالقيله قـوم فـي دربـه خذاهـا




ماجد الميزاني





داخل الله من حدوث الذنب وسهوم المنايا////////ونت لو تشوف قدمك نار لاتقرب سناها


جيتنا ونت الحلا وشلون نلقالـك حلايـا////////قبل لانعرف سبيه ماعرفنا من سباهـا




محمد الزيداني




ناركم برد وسلام ولا من الطيب رزايا///////دامك من الدبدبه يادابه مدري دباهـا


انته ابلشت القضاه الي يحلون القضايا///////حاجةً ماهي حرام ولاحلا ل ولا نباهـا




الحميا 10-26-2010 12:17 AM

رد: متصفح المحاورات المباشره (للاطلاع)
 
هامة دكا
سلام تسليمة وفا تحمل معزه واحترام === بسم الهجوس الي مع العراف تاخذ قسمها
دام المواطن ياخضرماشي على حسب النضام===سم القرارات الي تصدر ياالبقيلي سمها



الحميا
يا مرحبا تكريم واكرم به الناس الكرام ///// بسم الهجوس الي مع العراف زايد سلمها
لي نضرة(ن) صوب الجنوب ولي نضروا لد شام///// واصعب قرار انك تفكر في الشعوب ولمها
هامة دكا
دام البقا سالم وتسلم كان ودك باالسلام ==== وابحث عن الفتنه ودور ياالبقيلي عمها
عن طرقة اعيال الحلال يجنب اعيال الحرام === واهل الحلال ابهمها واهل الحرام ابهمها



الحميا
ترى الجمل والثور فوق اضهورها تلقى سنام //// لاكن في حمل الثقال الثور ماهو يمها



قديش ياهامة دكا نبني الاماني باالكلام //// وام الكباير كل من جاها يقبل خشمها



هامة دكا
تغلي حميه وانت ماحد رسمك قايم مقام ==== والوقت ضالم وانت قاسيت السنين وضلمها
ان كان تعرف ياخضر وصف الصقور امن الحمام === اوصيك ثم اوصيك عن شغل العباه وكمها
الحميا
احسبك صالح ترغب الاصلاح لاكن ماتلام //// اهل الحسد من يقدر يشيل الحسد من دمها
بكره الحقيقه تنعرف والنور جلاي الضلام ///// وعقولكم تحلم وتلقى من يفسر حلمها



هامة دكا
العام حصلت البقيلي بين زمزم والمقام === واليوم خصما للخصوم الي تكفر خصمها
انته محلك في القصور الشامخه كب الخيام === كحل عيون الخصم من ملح الثميدي واعمها
الحميا
العام ياهامة دكا مغرم وذابحني الغرام ///// بغيت احب البنت مير ابليت في حب امها
ان سار في راسك طناخه سار في خشمك عرام ///// وانته بعزمك والنشاما ماتخلي عزمها
هامة دكا
لاتعتزي الا في الذي يقدر يسرك في الزحام === قدام لابقعا تخمك ياالبقيلي خمها
الحي منكم نابغه ومن مات جعله للرحام === وهذيل ربعك ياخضر وش علمها وش علمها
الحميا
دام العطيبه في يميني والمقبس في الحزام /// في محزمي طب الكبود وفي يديني سمها

هذيل عزوة من تعزاها عليه باالحرام //// يوم الحرايب لابتي فوق العلابي وسمها



الحميا 11-08-2010 12:52 AM

رد: متصفح المحاورات المباشره (للاطلاع)
 
محاورة الشاعرين

ابو ملاذ و عبدالرحمن مساعد

بو ملآذ
ياسلامي سلام الطرقي المجبور // مرّ في ديرة ً ماله مبـيـت ابها
بن مساعد علاجه تعب الدكتور // ما يـبا يقبل الجرعه ويشربها
؛

عبد آلرحمن بن مسآعد
مرحبا عد مايبدي شعاع النور // وانت جيّتك لاتامن عواقبها
بن مساعد ترى مايكشف المستور // كان عندك علوم وافيه جبها

؛

بو ملآذ
البقا ماخبرت الوادي الممطور // ينبت الشوك وانا اعرف مجانبها
جيت اداوي جناح الطاير المكسور// يوم غيري عجز يقدر يطببها
؛
عبدآلرحمن بن مسآعد
لو تعذر ترى ماقول لكـ معذور // ديرة ن كل نبته في مناكبها
انت كنكـ تقول ان الحمام صقور // ماعطتكـ الليالي من تجاربها
؛

بو ملآذ
بعد جاها المطر غرد بها العصفور // واول العام مايلقى مكان ابها
انت شكلك تدربل قالب الناظور // فتح العين وارفع من حواجبها

؛

عبدآلرحمن بن مسآعد
من يراقب فخلق الله مـا هو مسرور // والمثل قال مات اللي يراقبها
الذيابه تعشت واتركت لكـ سور // وانت ودكـ ..تشرقها تغربها
؛
بو ملآذ
بدخل الحج بحرامي وابيع اتمور// تنقبل حجتي واضمن مكاسبها
سفرتك لا يجي فيها خلل واقصور // وانـتـه اللي بيدينك مقربها


؛

عبدآلرحمن بن مسآعد

كان جبت التمر ماقلت لكـ مشكور // مهنتكـ كل عاقل.. مايقربها

والله اني ما صاحبت العمي والعور // يوم غيري من العربان صاحبها


الحميا 11-08-2010 12:56 AM

رد: متصفح المحاورات المباشره (للاطلاع)
 
محاورة الشاعرين

بن قاسي وبرق الحيا

==========

برررق الحيا

يابن قاسي- والسلام القيه من كفـك ليدهـا /////الهنوف اللي ليا ناديتهـا تحضـن ذراعـي

حالم ٍ اللي في جمال تحوم في الصحرا وحدها ///// والجمال اليا اجفلت يبغي لهاعشرين راعـي


بن قاسي

مرحبا باللي يقدمها على حروه وعدها=كل ماناديتها جتني تبسم باندفاعي
مايغر الرجل غير احلام في ليله رقدها= بين حبه للسفور وبين حبه للقناعي


برررق الحيا

البقا لك كان تدري للوفا نـاس بجهدهـا ////همها تجمع صفوف اهذيل ياذيب السباعي
وفيه ناس مقاحرتنا لبغيت الصدق ودهـا ////مايجي لهذيل مد ولا يجي لهذيل صاعـي

بن قاسي

الجهود اللي على وضح النقا ماحد جحدها= وكل شي نسجله باقلامنا خوف الضياعي
خلهم في غيهم وقلوبهم زايد نكدها =دامهم مايلحقونا بالنسب والا الرضاعي

برررق الحيا






يابن قاسي منت لاقي حاجة ٍ محد ٍ وجدها/////مايبيع الورد في سوق الحطب رجال واعي
الجميله مانقصها شئ لـو تتـرك بلدهـا//////والقبيحه من يبيها لو تمد الـك الكراعـي



بن قاسي

ماعليه اللي على كور الذلول اليا لكدها=شقت الارض الخليه لوّ مافيها اتساعي
عينك اللي ماتغشك كان تسلم من رمدها=وانت مادري عنك وش تسمع من البث الاذاعي

برررق الحيا

ماحسدنا الناس يوم الناس مشقيها حسدها////مير ماكل الطيور تطير يالدفـع الرباعـي
يابن قاسي كان توحيني عسي فالك سعدها ////وكان وانك لاهي ٍ لساع لاتنقـد سماعـي






بن قاسي
وش نحسدك فيه يابرق الحيا مادري رعدها=كل ماقلنا كريم البرق ,,بادربانقطاعي
حشمة للي دعانا جيت واسمع وش بعدها=السلام ختام,, تلقى خير ,,عنوان الوداعي



الحميا 12-13-2010 12:24 AM

رد: متصفح المحاورات المباشره (للاطلاع)
 
محاورة الشاعرين

هشام المعطاني الهذلي

شاهر الكعبي ( ابو ملاذ )


هشام الهذلي



سلامي سلامٍ فيه مبدا البدايه // وبعد البدايه فيه موجز وتفصيل

نقدم وسايلنا على شان غايه // ومن لا يقول تصير فيه الأقاويل




ابو ملاذ





هلا مرحبا ترحيب فيه الكفايه//كتبته لخوي اهشام في راية اهذيل


نقدم ولاندري اش تكون النهاية//مدام المطر يمطر ولايدرج السيل


هشام الهذلي


يدوم البقا وإن كنت راعي رمايه // تصيب الهدف ما انته فحاجة لدربيل
أنا من صحيح المتن جبت الروايه // ولا جبت علم ألا عليه الدواليل


ابو ملاذ


أنا ماعطيت الشاذليه قفايه // لكن السبب فاللي يدس الفناجيل


ترى النار في روس الفتايل دعاية // ليا بانت القمرا تضيع القناديل




هشام الهذلي


أنا اذكرك قدامي ولا أنته ورايه = واخذت انته الفنجال بين الرياجيل
ليا صرت ما تسمع يا شاهر دعايه = تذكر وش اللي صار عند أول الليل



ابو ملاذ


ليا قال لك ضيفك تبقى عشاية // تعشيه والا في الليالي المقابيل


حصل خير لكن فالطريق إلتواية // وانا جيت اكيل الكيل واعدل الميل


هشام الهذلي


ليا كان ضيف الله عليه الوصايه = وأنا أعرف مقام الضيف بالحيل بالحيل
تبا تحتمي وأنت مسوي حمايه = وترى المرضوي لازم يشيل المعاديل



ابو ملاذ


سمعت ابخبر يمكن سمعته كمايه ** عن اللي يبيع النوق ويهجن الخيل


تقارب هل المعروف غاية منايه ** ولو كُنت ما بسلم من القال والقيل

هشام الهذلي

سمعت بدعا من هو دعا بالهدايه = يحبك ولا يرضى عليك البهاذيل
ما دام انت هاوي تحت حكم الهوايه = يشدك على ما قيل صوت المواويل


ابو ملاذ

يجينا خبركم فوق شاشة بدايه // تشبون نيرتكم فروس الفشاعيل

زهى فوقك المشلح فوجه المرايه // وتحسبك من حكام نجد الحلاحيل


هشام الهذلي

تعرف الكتابه ما تعرف القرايه = وهذي حقيقه واكشفتها المراسيل
ولا لك على حكم الجزيره ولايه = لو انك تباها تنقسم بالتساهيل


ابو ملاذ

انا احلق ابفكري فعالي سمايه//ولا انزل بفكري في جميع المنازيل

سوالفك حاويها بحسن الدرايه //عن اللي فعينه يدرج الكحل بالميل


الحميا 12-30-2010 01:32 AM

رد: متصفح المحاورات المباشره (للاطلاع)
 

محاورة الشاعرين
عماد الهذلي
و
عبدالرحمن مساعد


عبد الرحمن :::

سلام ..من قلب ولسان وفكر واحساس وضمير ** ينصى هل الطالات ربعي والضيوف يعمها
يـ عماد دفوكـ الجماعه وسط نار(ن) من سعير ** وام الخــلاخل بعد هذا اللــيل تــعرف عمها


عماد ::

يا مرحبا ترحيب أسوقه للكبير وللصغير ... من باب تقدير الرجال إللي المراجل همها
يـعماد سموك الجماعه وأنت للطالة سفير .....لو إن بعض الناس مدري ليه فاير دمهـا


عبد الرحمن ::

ودكـ تصّير شي ياابن الناس عمره مايصير! ** وانته تعرف العقرب اللي في ذنبها سمها
الكلمه اللي لاهي بفعل ولا اسم ولاضمير ** اللي عليــها فتحه وشده ..لـزوم تضمها


عماد ::


لا والله إنا ما وردنا الا على العد الغزير .... ولانمدح العربان لامن جات ثم نذمهـا
من أنت ياللي تدهن المقبل وتلزم للمغير ..... وتشعى عراقيبك ليا قفيـت ثـم تلمهـا


عبد الرحمن :::

احسبك وارد بحر مثلي محسبك وارد غدير ** حث الخطـا يم العدود اللي يـروّي جمـها
اكبر مصيبه يابشر نسمع رغى عقب الهدير ** يمكن ظروف الوقت حالت به وراح فكمها


عماد :::

يبست في عود القصب ولا لك جناح (ن) تطير .... واذانـك الثنتيـن تفتحهـا ونوب تصمها
ياللي تغص بحسنتي وفسيتي لـك جـو غيـر.... انصحك حاجاتك باساميها الصريحـة سمهـا


عبدالررحمن :::

امسيت مثل الحبه اللي في رحاها تستدير ** كن ربعكـ يالعبيدي لاتزود غمها
افحسنتكـ ..مُحسن عليكـ ولاتبا تصبح فقير ** وافسيتكـ ..مالي بها ..داخل ..يغطي فمها


عماد :::

يابــو مســـاعد والله إنك منـــت ناقص ملـــح ميــــر .... بعض اخوياك عليك يحذفها الخطا ويخمهـــا
أنته مغـرر بـك يقودونـك هـل البـاع القصيـر .... ماهـي جديـدة "خابريـن" البـنـت تطـلـع لأمـهـــــــا

الحميا 12-30-2010 01:39 AM

رد: متصفح المحاورات المباشره (للاطلاع)
 
محاورة الشاعرين
صنت البدراني
شاعر الوطن ( قبل بن باخت المسعودي )


صنت البدراني





سلامي سلامٍ مثل طعم العسل مبداه
يعم الرجال اللي عريبـه مناسبهـا

////


ابا ارسل على ماجد عسا خطنا يقراه
يفك الحروف اللي على طيب كاتبها




شاعر الوطن





هلا مرحبا ترحيب علم الوفا يبراه
تسدك حضور هذيل عن رد غايبها
///////


بعد جيت تلقا الكيف والنار والمقهاه
علاها مصافي تبعد اعماس شاربها




صنت البدراني





يدوم البقى والبيت معروف من مبنـاه
وانا ماني مفرق عرب عن قرايبهـا
///////


توكل على الله والهدف طاب لي مرماه
عسا بندق القناص تحمي مضاربهـا




شاعر الوطن





ليا زان معنا القاف بفكارنـا زدنـاه
خصوم الخصوم اليا تناصت مناكبها
/////


تنحرت موج البحر والبحر من ينصاه
امواج البحور الي هاواها يجاذبهـا




صنت البدراني





ابا حد ابو عرام للضلع والمضماه
وقطع حباله من عراوي مقاضبها
///////


تذكر زمانٍ فات ترقص على ذكراه
وراحت خيار القوم تبكي مناصبها




شاعر الوطن






على الهون ياساري بليل (ن) قوي مسراه
ترا من وراك اليـال واحسـب عواقبهـا
////////


طرحك الزمان بوادي (ن) والمطر ماجاه
سوات الذلول الي حنا الوقـت غاربهـا





صنت البدراني





حسبنا حساب الوقت من جودنا سقناه
وكـفٍ نصافحهـا وكـفٍ نعاقبهـا
//////


تقوله ورجلك حولت والخطر تبغـاه
سوات الفراشه كـلٍ نـارٍ تناسبهـا





شاعر الوطن






ليا مالقيت الرجل وسط الشحم يمناه
مابخاطبه له ناس غيري يخاطبهـا
//////


ليا ما لقينا العد والما عذب عفنـاه
وردنا العدود الي عذيه مشاربهــا

الحميا 04-17-2012 11:27 AM

رد: متصفح المحاورات المباشره (للاطلاع)
 
الشاعر / عبيد الله المجيريشي

الشاعر / خضر البقيلي الهذلي ( الحميا )

الحميا:


هلا مرحبا وانا نويت المجاريش /// من الهاجس الي ماخسر وزن ريشه
ولا ياعبيدالله ترى قتلت الشيش /// بـــيد الغشيم الـــي قفل باب شيشه


عبيدالله المجيريشي:


يدوم البقا مير انت ناوي على ويش ///حداك الزمن والا ظروف المعيشه
تموت الحصى والرمل والطيب ايعيش///وراعي العريش يطيح فوقه عريشه


الحميا:


ترا مشكله لو يلتقي الجيش باالجيش /// يضيع الدقيش الي مايمن دقيشه
انا كيف اترجم سالفه للدراويش /// ليا قـــلت هذا الباب قالـــــــو دريشه


عبيدالله المجيريشي:


نوقد عليك النار يالقدر وتغيش /// وحنا عرب مايقبلون الغشيشه
طيور القطى ماعاد بجنوبها ريش /// تعيش ابزمن والا زمن ما تعيشه

الحميا:


على اقماركم ياهل التهم سار تشويش /// غدا ارسالكم ما نسمع الى وشيشه
ولا ادري متى تطلع قرون لغنم بيش /// وتجار بيش استثمرو ثلث بيشــــــــه

عبيدالله المجيريشي:



على دربكم ظباط وانقاط تفتيش/// تمنى الممات ولا الدروب الوحيشه
بعد صابكم ضرب الرصاص المحاديش/// تشمون ريح المبخره ريح شيشه

الحميا:
ترانا تعدينا نقاط البخاشيش /// ولاحـــنا مـــن الي يقبلــــــــون الخشيشه
علا ويش قلي يابو سامي ولجل ايش /// تدفون في انحور المنايا هطيشه

عبيدالله المجيريشي:

اخذتم طبائع من طيور الخفافيش /// حسدتم معيش اللي تزوج معيشه
لحقتم من اسمان الليالي تناتيش /// ولــــــــكن مابل الكبود العطيشه

الحميا 04-19-2012 02:41 PM

رد: متصفح المحاورات المباشره (للاطلاع)
 
بشت المسعودي

سلام رديه على دار الكرامه والشـــبب !!!!دار الرجال اللي على الماقف تسـد ديونها
يابن مغبّش كل شي .الله مقدم له سبب!!!! يوم الهواجس معك ماتبخــل بحلو لحونها



خالد الهذلي

يامرحبا ترحيبتن تمشـي علـى سلـم العـرب!!!!ربعي هذيل اهل الكرامـه تحتـزم مـن دونهـا
اسبح بحر وانحت صخر واطرب ليا عن الطرب!!!!في ليلة(ن) شفـت الاوادم يـم بشـت عيونهـا


بشت المسعودي

دام البقا والحي ماياخذ يكود اللي انكتب !!!!لو كبّرت بعض العرب في قسـمها ماعونها
يابن مغبش ودنا بالنار ونشب الحطب!!!!في ليلتن يطرب لها الهذلان ماينسونها

خالد الهذلي



انا ليا جات البضايع قلـت وينـك يالذهـب !!!!واهل الذهب صرت على كيس الذهب بسنونها
يابشت ابن مسعود شوف العد ملاي القـرب!!!!وهذيل لاشافـو العـدود الراهيـات يجونهـا




بشت المسعودي

حنا نبيع ونشتري واللي خسر واللي كسب!!!! هذي التجاره والشريطيه تحت قانونها
لو يطمع الطماع ماياخذ من النخله رطب!!!! لو قال للتجار يمّي ميّلت عرجــــــــونها

خالد الهذلي


الليله المعنى يبى يمشي على روس الركب !!!!مليان ظهره والبيـوت مثقـلات بطونهـا
بنت الهوا شفت النشاما ودها ياكم خطـب!!!!كلا يبى يرمي على وجه القصيد ردونهـا


بشت المسعودي


الليله التاريخ لازم تكـــــــــتبونه بالكتب!!!!ثم احضروا عمان ليلى واربطوا مجــنونها
الله يعزك ياللحا تكرم ولو حف الشنب!!!! انقولها ونعـــــــــــــــيدها خل العرب يوحونها

خالد الهذلي

ياطرقة السارين مابين المسافـه والتعـب!!!!اقلوبهم عجله ولو طالـت يبـى يسرونهـا
يابيتنا الي من حجر ساسه وسقفه من خشب !!!!وين النشاما الي ليا طالت تعـز اركونهـا





الساعة الآن 04:16 PM.

Powered by vBulletin® Copyright ©2000 - 2018, Jelsoft Enterprises Ltd. , TranZ By Almuhajir

Ads Management Version 3.0.1 by Saeed Al-Atwi

الحقوق محفوظة لشبكة هذيل

Security byi.s.s.w