جـرح الليــال

[عبدالله الطلحي]

لاتقول إن لقيانا محال=لاتقول إن قلبي مايطيق
شوفني شلت حملٍ مايشال=شايله لأجل طيفك لي رفيق
حمل لوكان بظهور الجمال=نوخت به على جال الطريق
في غيابك لوإن الما زلال=لارواني ولا بليت ريق
حاصرتني الهموم اللي ثقال=وحبستني وانا حرٍ طليق
بين ثنتين مافيها جدال=حاجة النفس والسد الوثيق
اجرع الصبر لو الصبر طال=وارمي السر في بيرٍ عميق
وابني احلام من نسج الخيال=واتعلق بها مثل الغريق
وانت جرحٍ على طول الليال=مادرابه عدو ولاصديق
غير ربٍ عليم بكل حال=وحده اللي يفرّج كل ضيق
بس لازال في بالي سؤال=بإنتظار الجواب اللي يليق
كيف رغم المسافات الطوال=وانت كنك على قلبي تويق
كلما شفت للفرحه مجال=قمت شبيت باعماقي حريق
ورغم قسوتك قلبي لايزال=هايمٍ فيك عيّا لايفيق
والمشاعر تناديلك تعال=طال صبري وقلبي مايطيق

[مشارك جديد]

صح لسانك يابوناصر على هذه الدرر

[الموسمي]

صح لسانك ابو ناصر الله يعطيك العافيه

[قمر الرياض]

صح السانك اخووي

والله يعطيك العافية

[سمــ العز ــــو]

كلما شفت للفرحه مجال=قمت شبيت باعماقي حريق
ورغم قسوتك قلبي لايزال=هايمٍ فيك عيّا لايفيق

صح السانك اخوي

ويعطيك العافية

[الحنان الدافئ]

الله يعطيك العافيه اخوي عبدالله على الابيااات الجميله

تحياتي لك أختك الحنان الدافئ

[المهاجرة]

صح لسانك ابو ناصر
مشكوووووووووووووووووووووور