|
يا صاحبي ما هو طرب يوم أغنّي=حتى لو أعجبك الغنا و المواويل
هذا القَهَر في مهْجتي مستكنّي= و ليا تحرّك .. قلت يا ليل يا ليل
عَلّه يروق وخاطري يرْجهنّي= بعد العنا و الضيق و الحطّ و الشيل
مدري متى ينزاح .. ها لهمّ عنّي= اللي بصدري له مقرّ و مداهيل
مشاكلي ما هي على قدّ.. سنّي= بدري على هذا العنا و الغرابيل
لَعْبَتْ بي الدنيا على كلّ فنّي= بين الفرح و الحزْن و العدل و الميل
أعيش فيها كلّها .. بالتأنّي =و عقلٍ سليم .. يحلّل العلم تحليل
إن جات لي .. هذي مناة التمنّي =و إن جات ضدي .. شفتْ للعلم تحويل
والحمْد للْه محسنٍ فيه ظنّي =بُعْد النظر.. وفّرْ عليّ الدرابيل
أحْفظْ يديني .. قبل لا ترْتهنّي =و أطهّر لساني .. من القال و القيل
ولا أناظر اللي حذْفته ما تصلنّي =حتى محد يلقى عليّه مداخيل
و إن جاتني .. والله لا أعقِّل و أثنّي =تعقيلة العاقل .. تروع المهابيل
هذا الصحيح .. و كلْمة الحق منّي= كسْب المواقف .. ما يجي بالتساهيل
يا ما جرالي .. في ليالٍ مضنّي= والعالم الله .. با لليال المقابيل
عَزّالله .. إني ما أخْبُر اللي غبنّي =غير الزمان اللي غَبَنْ له رياجيل
|
